വൈകാരിക സമീപനത്തിനപ്പുറം ഇത്തവണ വോട്ടർമാർ പ്രായോഗിക പ്രശ്‍നങ്ങൾക്കായിരിക്കും മുൻഗണന നൽകുക എന്നും സർവ്വേ പറയുന്നു. ദി ഹിന്ദുവിൽ പ്രസിദ്ധീകരിച്ച അഭിപ്രായ സർവ്വേയിൽ 27 ശതമാനം ആളുകളും തിരഞ്ഞെടുപ്പ് വിഷയമായി ഉയർത്തി കാട്ടുന്നത് വിലകയറ്റവും തൊഴിലില്ലായ്മയുമാണ്. വികസനം ചർച്ചയാകുമെന്ന് 11 പേർ അഭിപ്രായപ്പെട്ടപ്പോൾ അഴിമതിയും രാമക്ഷേത്രവും തിരഞ്ഞെടുപ്പ് വിഷയമാകുമെന്ന് കരുതുന്നവർ 8 ശതമാനം മാത്രമാണ്. സർവ്വേയിൽ പ്രതികരിച്ച മൂന്നിൽ രണ്ട് പേരും തൊഴിൽ കണ്ടെത്താൻ പ്രയാസപ്പെടുന്നതായി അഭിപ്രായം പങ്ക് വെച്ചു. ആകെ പ്രതികരിച്ചവരിൽ 12 ശതമാനം ആളുകൾക്ക് മാത്രമാണ് ജോലി നേടാൻ എളുപ്പമാണെന്ന അഭിപ്രായമുള്ളത്.ജനങ്ങളുടെ അടിസ്ഥാന പ്രശ്നങ്ങൾക്ക് സംസ്ഥാന സർക്കാറുകളെക്കാൾ ആളുകൾ വിമർശിക്കുന്നത് കേന്ദ്രസർക്കാരിനെയാണ്. രാജ്യത്തെ തൊഴിലില്ലായ്മയ്ക്ക് കാരണം കേന്ദ്രസർക്കാരാണെന്ന് 21 ശതമാനം പേർ അഭിപ്രായപ്പെട്ടപ്പോൾ 17 ശതമാനം പേർ സംസ്ഥാനസർക്കാരുകളുടെ മേൽ ആ കുറ്റം ചുമത്തി. 57 ശതമാനം ആളുകളുടെ അഭിപ്രായം തൊഴിലില്ലായ്മയുടെ ഉത്തരവാദി ഇരു സർക്കാറുകളുമാണെന്നാണ്. വിലക്കയറ്റത്തിന്റെ കാര്യത്തിൽ 26 ശതമാനം കേന്ദ്രത്തെയും 12 ശതമാനം സംസ്ഥാനത്തെയും 56 ശതമാനം ഇരുസർക്കാരിനെയും കുറ്റപ്പെടുത്തി.

അഴിമതിയുടെ കാര്യത്തിലും കേന്ദ്രസർക്കാരിനെതിരെയാണ് സർവ്വേ ഫലം. 55 ശതമാനം പേർ കഴിഞ്ഞ അഞ്ചു വർഷത്തിനിടയിൽ അഴിമതി കുത്തനെ ഉയർന്നതായി അഭിപ്രായപ്പെട്ടു. അഴിമതിയുടെ കാര്യത്തിൽ 25 ശതമാനം പേർ കേന്ദ്രത്തെ പ്രതിചേർത്തപ്പോൾ 16 ശതമാനം സംസ്ഥാന സർക്കാരിനെയും 56 ശതമാനം പേർ ഇരുസർക്കാരിനെയും പ്രതിചേർത്തു.