ലോക്‌സഭാ തിരഞ്ഞെടുപ്പ് മൂന്നാം ഘട്ടത്തിലേക്ക് കടക്കുമ്പോള്‍ തന്ത്രങ്ങള്‍ മാറ്റി പയറ്റുകയാണ് ഭരണകക്ഷിയായ ബിജെപി. മോദി പ്രഭാവത്തിലും വികസന അവകാശ വാദങ്ങളിലും ഊന്നിയായിരുന്നു ബിജെപിയുടെ ആദ്യഘട്ട പ്രചാരണങ്ങളെങ്കില്‍ ഒന്നാം ഘട്ടം പിന്നിട്ടപ്പോള്‍ കൂടുതല്‍ ആക്രമണ സ്വഭാവം കൈവന്നുകഴിഞ്ഞു. പ്രതിപക്ഷത്തെ ഒന്നടങ്കം കടന്നാക്രമിച്ചും, മുസ്ലീം വിരുദ്ധത വാരിവിതറിയുമുള്ള ബിജെപിയുടെ പ്രചാരണങ്ങള്‍ക്ക് പ്രധാനമന്ത്രി നരേന്ദ്രമോദി തന്നെയാണ് നേതൃത്വം നല്‍കുന്നത്. കോണ്‍ഗ്രസ് അധികാരത്തിലെത്തിയാല്‍ സംവരണം അട്ടിമറിക്കും എന്നും മുസ്ലീം ന്യൂനപക്ഷ വിഭാഗങ്ങള്‍ക്ക് കൂടുതല്‍ ഇളവുകള്‍ നല്‍കുമെന്നുമുള്‍പ്പെടെ ബിജെപി നേതാക്കള്‍ ആരോപിക്കുന്നു.

സംവരണം വിഷയമാക്കി ബിജെപി നടത്തുന്ന തിരഞ്ഞെടുപ്പ് പ്രചാരണങ്ങള്‍ ജാതി സെന്‍സെസ് എന്ന പ്രതിപക്ഷ തന്ത്രത്തെ മറികടക്കാനാണ് എന്നാണ് വിലയിരുത്തല്‍. ഒബിസി പിന്നാക്ക വിഭാഗങ്ങള്‍ മുഖം തിരിച്ചപ്പോള്‍ പല തവണ ബിജെപിക്ക് കൈപൊള്ളിയിട്ടുണ്ടെന്നാണ് തിരഞ്ഞെടുപ്പ് ചരിത്രം വ്യക്തമാക്കുന്നത്. 2014ല്‍ അലയടിച്ച മോദി തരംഗത്തിനെ 2015ലെ ബിഹാർ തിരഞ്ഞെടുപ്പില്‍ പിടിച്ചുകെട്ടാന്‍ നിതീഷ് കുമാറിന്റെയും ലാലു പ്രസാദ് യാദവിന്റെയും നേതൃത്വത്തില്‍ രൂപീകരിച്ച മഹാഗഡ്ബന്ധനായിരുന്നു. സംവരണം പുനഃപരിശോധിക്കണമെന്ന ആര്‍എസ്എസ് മേധാവി മോഹന്‍ ഭാഗവതിന്റെ പരാമര്‍ശം ഉള്‍പ്പെടെ ബിജെപിക്ക് വിനയാവുകയും ചെയ്തു. ഒബിസി വോട്ടുകള്‍ കൂട്ടത്തോടെ ആര്‍ജെഡിയും ജെഡിയുവും സ്വന്തമാക്കിയതാണ് ബിഹാറില്‍ നേരിട്ട തിരിച്ചടിക്ക് കാരണം.

വികസനത്തിലൂന്നിയുള്ള ബിജെപിയുടെ പ്രചാരണതന്ത്രങ്ങളില്‍ തന്നെ നിലവില്‍ മാറ്റമുണ്ടായിട്ടുണ്ട്. ഒബിസി, ദളിത്, ആദിവാസി വിഭാഗത്തിൽപ്പെടുന്നവരുടെ അവസരങ്ങൾ ഇല്ലാതാക്കി മുസ്ലിം വിഭാഗത്തെ സഹായിക്കുന്നവരാണ് പ്രതിപക്ഷം എന്ന് സ്ഥാപിക്കാനുള്ള ശ്രമങ്ങളും പ്രകടമാണ്. പഴയ ഹിന്ദുത്വ പരീക്ഷണത്തിന്റെ പുതിയ പതിപ്പായാണ് ബിജെപിയുടെ ഈ നീക്കം വ്യാപകമായി വിലയിരുത്തപ്പെടുന്നത്.

2014ല്‍ ബിജെപി അധികാരത്തിലെത്തിയതില്‍ പിന്നാക്ക ഹിന്ദുവോട്ടുകളും നിർണായകമായിരുന്നു. എന്നാല്‍ പത്ത് വർഷത്തിനിപ്പുറം ആ വോട്ട് നിലനിർത്താന്‍ ബിജെപിക്ക് കഴിയുമോയെന്നത് ചോദ്യമാണ്. 2023ൽ നടന്ന സംസ്ഥാന നിയമസഭാ തിരഞ്ഞെടുപ്പുകളിൽ കോൺഗ്രസും പ്രതിപക്ഷ കക്ഷികളും മുന്നോട്ടുവച്ച ജാതി സെൻസസ് എന്ന ആശയം വലിയ തോതിൽ പിന്നാക്ക ഹിന്ദു വിഭാഗങ്ങളെ സ്വാധീനിക്കാൻ സാധ്യതയുള്ളതാണ്. അതുകൊണ്ടു തന്നെ 2024ലെ തിരഞ്ഞെടുപ്പ് വ്യത്യസ്തമായിരിക്കുമെന്ന വിലയിരുത്തലുകളാണ് പുറത്ത് വരുന്നത്.

സംവരണ പരിധി 50 ശതമാനത്തിൽ നിന്ന് ഉയർത്തുമെന്നതാണ് ജാതി സെൻസസിലൂടെ കോൺഗ്രസും ഇന്ത്യ സഖ്യവും മുന്നോട്ടു വയ്ക്കുന്ന പ്രധാനപ്പെട്ട വാഗ്ദാനം. ഇതിലൂടെ സാമൂഹിക പിന്നോക്കാവസ്ഥ അനുഭവിക്കുന്ന വിഭാഗങ്ങളെ മുന്നിലേക്ക് കൊണ്ടുവരാൻ സാധിക്കുമെന്ന അവകാശവാദം കോൺഗ്രസ് നേതാവ് രാഹുൽ ഗാന്ധി ഉന്നയിച്ചു കഴിഞ്ഞു.

ഇത്തവണ എന്‍ഡിഎ 400 സീറ്റ് നേടി അധികാരത്തില്‍ തുടരുമെന്ന അവകാശവാദമാണ് തിരഞ്ഞെടുപ്പ് റാലികളില്‍ നരേന്ദ്ര മോദി ഉന്നയിച്ചത്. പ്രതിപക്ഷത്ത് നിന്ന് നിതീഷ് കുമാർ, ഏക്‌നാഥ് ഷിൻഡെ, അജിത് പവാർ തുടങ്ങി നിരവധി നേതാക്കളെ പാളയത്തിലെത്തിച്ചതാണ് ബിജെപിയുടെ ആത്മവിശ്വാസത്തിന് പിന്നില്‍. ഭരണഘടന മാറ്റാനാണ് തങ്ങൾക്ക് നാനൂറിലധികം സീറ്റുകൾ ആവശ്യമെന്ന് ബിജെപി നേതാക്കൾ തന്നെ പ്രസ്താവന നടത്തിയതും പ്രതിപക്ഷം ആയുധമാക്കി. ബിജെപി മൂന്നിൽ രണ്ട് ഭൂരിപക്ഷം നേടി ഭരണഘടന മാറ്റുമെന്നും സംവരണം ഒഴിവാക്കുമെന്നുമുള്ള പ്രചരണം വോട്ടർമാരെ സ്വാധിനിക്കുമെന്ന പ്രതീക്ഷയാണ് പ്രതിപക്ഷത്തിനുള്ളത്.