ദിലീപിന് ആശ്വാസം: ജാമ്യം റദ്ദാക്കില്ല
സിനിമാ നടിയെ ആക്രമിച്ച് ദൃശ്യങ്ങള് പകര്ത്തിയെന്ന കേസിലെ എട്ടാം പ്രതിയായ നടന് ദിലീപിന് കോടതിയില് താല്ക്കാലിക ആശ്വാസം. ദിലീപിന്റെ ജാമ്യം റദ്ദാക്കില്ല. സാക്ഷികളെ സ്വാധീനിക്കാന് ശ്രമിച്ചുവെന്നാരോപിച്ച് സര്ക്കാര് നല്കിയ അപ്പീല് ഹൈക്കോടതി തീര്പ്പാക്കി. പ്രത്യേക കോടതിയുടെ ഉത്തരവിലെ പരാമര്ശങ്ങള് വിചാരണയെ ബാധിക്കരുതെന്നും ഹൈക്കോടതി നിര്ദ്ദേശിച്ചു. ഇക്കാര്യത്തില് വ്യക്തത വരുത്തിയാണ് ഹൈക്കോടതി ഹര്ജി തീര്പ്പാക്കിയത്.
ജാമ്യത്തില് പുറത്തിറങ്ങിയതിന് ശേഷം സാക്ഷികളെ സ്വാധീനിക്കാന് ദിലീപ് ശ്രമം നടത്തിയെന്നും തെളിവുകള് അട്ടിമറിക്കാന് ശ്രമിച്ചുവെന്നുമാണ് സര്ക്കാര് ഹര്ജിയില് ആരോപിച്ചത്. ദിലീപിന്റെ ജാമ്യം റദ്ദാക്കണമെന്ന ആവശ്യവുമായി സര്ക്കാര് വിചാരണ കോടതിയെ സമീപിച്ചിരുന്നെങ്കിലും തള്ളിയിരുന്നു. തുടര്ന്നായിരുന്നു ഹൈക്കോടതിയെ സര്ക്കാര് സമീപിച്ചത്. 2022 ആയിരുന്നു പ്രോസിക്യൂഷന് കോടതിയെ സമര്പ്പിച്ചത്. ഈ കാലയളവില് സാക്ഷി വിസ്താരം പൂര്ത്തിയായതിനാല് ജാമ്യം റദ്ദാക്കണമെന്ന ആവശ്യത്തില് നിന്നും പ്രോസിക്യൂഷന് പിന്നോട്ട് പോയിരുന്നു.
നടിയെ ആക്രമിച്ച കേസിലെ നിര്ണായക തെളിവായ ദൃശ്യങ്ങളടങ്ങിയ മെമ്മറി കാര്ഡ് കോടതിയുടെ കൈവശമിരിക്കെ ചോര്ന്ന കേസില് ജില്ലാ സെഷന്സ് ജഡ്ജി നടത്തിയ അന്വേഷണ റിപ്പോര്ട്ടിന്റെ പകര്പ്പ് അതിജീവിതയ്ക്ക് കൈമാറാന് ഹൈക്കോടതി കഴിഞ്ഞ ദിവസം ഉത്തരവിട്ടിരുന്നു. റിപ്പോര്ട്ടിന്റെ പകര്പ്പ് കൈമാറുന്നതില് ദിലീപിന്റെ എതിര്പ്പ് തള്ളിയായിരുന്നു അന്ന് നടിക്ക് അനുകൂലമായി കോടതി നടപടി.