സിദ്ധാര്ത്ഥിന്റെ കൊല, നടപടി കടുപ്പിച്ച് പോലീസ്: പ്രതികള്ക്കായി ലുക്ക്ഔട്ട് നോട്ടീസ്
![](https://wetalkmedia.in/wp-content/uploads/2024/03/SIDRTH.jpg)
പൂക്കോട് വെറ്ററിനറി സര്വകലാശാലയിലെ സിദ്ധാര്ത്ഥന്റെ മരണത്തില് പ്രതികള്ക്കായി പൊലീസ് ലുക്ക്ഔട്ട് നോട്ടീസ് പുറത്തിറക്കി പോലീസ്. കേസില് 12 വിദ്യാര്ത്ഥികള്ക്കെതിരെ കൂടി നടപടിയെടുക്കും. 10 വിദ്യാര്ത്ഥികളെ ഒരു വര്ഷത്തേക്ക് വിലക്കുകയും ചെയ്തു. ഇവര്ക്ക് ക്ലാസില് പങ്കെടുക്കാനും പരീക്ഷ എഴുതാനും സാധിക്കില്ല. പ്രതികള് ഭീഷണിപ്പെടുത്തിയപ്പോള് മര്ദിച്ചവരാണ് ഇവരെന്നാണ് വിവരം. മറ്റ് രണ്ട് പേരെ ഒരു വര്ഷത്തേക്ക് ഇന്റേണല് പരീക്ഷ എഴുതുന്നതില് നിന്നും വിലക്കിയിട്ടുണ്ട്. മര്ദനമേറ്റതായി കണ്ടിട്ടും ആശുപത്രിയില് എത്തിക്കാത്തതിലാണ് നടപടി. ഈ 12 വിദ്യാര്ത്ഥികളേയും ഹോസ്റ്റലില് നിന്ന് പുറത്താക്കി.
ഹോസ്റ്റലിലെ വിദ്യാര്ത്ഥികള്ക്കെതിരെയും ശിക്ഷ പ്രഖ്യാപിച്ചിട്ടുണ്ട്. അക്രമം നോക്കി നിന്ന മുഴുവന് പേരെയും ഏഴ് ദിവസം കോളേജില് നിന്ന് സസ്പെന്റ് ചെയ്തു. ഈ ദിവസങ്ങളില് ഹോസ്റ്റലിലും പ്രവേശിക്കാന് കഴിയില്ല. ഫെബ്രുവരി 16,17,18 തീയതികളില് ഹോസ്റ്റലില് ഉണ്ടായിരുന്നവര്ക്കാണ് ശിക്ഷ. റാഗിങ് വിരുദ്ധ സമിതിയുടേതാണ് നടപടി. വിദ്യാര്ത്ഥികള്ക്ക് വേണമെങ്കില് വിസിക്ക് അപ്പീല് നല്കാമെന്നും ആഭ്യന്തര പരാതി പരിഹാര സമിതി വ്യക്തമാക്കിയിട്ടുണ്ട്.